Haalim Episode 10 by Nimrah Ahmed Read Online Now with High quality images without any watermark, read online or download full episode of your favorite novel Haalim Episode 10 by Nimrah Ahmed Read Online.

مرسل نے چونک کے چوکھٹ کو دیکھا۔ مراد راجہ اندر داخل ہو رہا تھا ۔
’’صبح بخیر آقا۔‘‘ ہاتھ باندھے جھک کے سلام کیا ۔ مرسل نے دو انگلیوں سے قریب آنے کا اشارہ کیا تو وہ قدم قدم چلتا اس کے عین سامنے آ کھڑا ہوا۔
’’آقا کی طبیعت ٹھیک ہے ؟دربار میں آپ کا انتظار کیا جا رہے ۔ میں نے سوچا خود حاضر ہو کے خیریت معلوم کر لوں۔‘‘ انداز میں تشویش تھی مگر آنکھیں چھوٹی کر کے وہ غور سے مرسل شاہ کا چہرہ دیکھ رہا تھا ۔
’’ہاں‘ ہاں۔ میں کچھ سوچ رہا تھا ۔اس نے دو انگلیوں سے کنپٹی مسلی پھر مراد کو بیٹھنے کا اشارہ کیا ۔ مراد محتاط نظروں سے اسے دیکھتا سامنے بیٹھا ۔
’’کہیے آقا۔ غلام کس طرح آپ کی پریشانی دور کر سکتا ہے ؟‘‘
’’تم ہمارے بنداہارا (وزیرِ اعظم ) ہو ‘ مراد ۔ اور ملاکہ سلطنت کا بنداہارا سلاطین کی شادیوں‘ اور ان کے بچوں کی پیدائش کے انتظامات کا نگہبان ہوتا ہے ۔‘‘
’’میں اپنے فرض سے بخوبی واقف ہوں‘ آقا۔ آپ کی اور ملکہ یان سوفو کی شادی میری نگرانی میں ہوئی تھی اور میں نے کسی قسم کی کسر نہیں چھوڑی تھی ۔‘‘
’’اور میں تم سے بہت خوش ہوں‘ اور اب….‘‘ مرسل نے تھوڑی کھجاتے ہوئے شانے جھٹکے ۔’’اب میں شہزادی تاشہ کو اپنے نکاح میں لینا چاہتا ہوں لیکن ملکہ اس بات پہ بہت جزع و فزع کریں گی ۔اس لئے میں چاہتا ہوں کہ تم بذاتِ خود اس تقریب کا انتظام کرو‘ اور ملکہ کے کسی بھی ممکنہ ردِ عمل سے نمٹنے کی حکمتِ عملی تیار کرو۔ یہ کام جلد از جلد ہو جانا چاہیے ۔‘‘ وہ عام سے انداز میں کہہ رہا تھا ۔ اگر فکر تھی تو صرف ملکہ کے ردِ عمل کی ۔
’’جو حکم ‘ آقا۔‘‘
مرسل نے پوشاک جھٹکی اورآگے بڑھ گیا ۔ مراد بے تاثر چہرے کے ساتھ پیچھے کو لپکا۔

Join Haalim Discussion Room